புதுச்சேரி, ஆக. 23- புதுச்சேரி ஸ்ரீ மணக்குள விநாயகர் கோவிலின் 63வது வருட பிரமோற்சவத்தை முன்னிட்டு துவஜாரோஹணம் என்கிற கொடியேற்ற விழா நடைபெற்றது.
புதுச்சேரியில் அமைந்துள்ள ஸ்ரீ மணக்குள விநாயகர் கோவில் உலக பிரசித்திபெற்றது. இந்த கோவிலின் 63வது வருட பிரமோற்சவ விழா அணுக்ஞ, விக்னேஸ்வர பூஜையுடன் காலை கொடியேற்றத்துடன் தொடங்கியது. யானை கொடி ஏற்றப்பட்டு கொடிமரத்திற்கு சோடச தீபாராதனைகள் காட்டப்பட்டது. தொடர்ந்து அலங்கரித்து வைக்கப்பட்ட விநாயகருக்கு சிறப்பு தீபாராதனை காட்டப்பட்டது.
இந்த விழா அடுத்த மாதம் செப்டம்பர் 13ந் தேதி வரை நடைபெறுகிறது. விழாவையொட்டி நாள்தோறும் காலை, மாலை வேளையில் சாமிக்கு சிறப்பு அபிஷேகம் மற்றும் ஆராதனை நடைபெறுகிறது. இதில் வருகிற 26-ஆம் தேதியன்று சித்தி புத்தி விநாயகர் திருக்கல்யாணமும், 30-ஆம் தேதி தேரோட்டமும், 31-ஆம் தேதி நர்த்தன கணபதி தேரடி உற்சவமும், பவுர்ணமி கடல் தீர்த்தவாரியும், வெள்ளி மூஷிக வாகன வீதி உலாவும், செப்டெம்பர் 1 ஆம் தேதி ஸ்ரீ வேதபுரீஸ்வரர் கோவில் திருக்குளத்தில் தெப்ப உற்சவமும் நடக்கிறது. செப்டம்பர் 7 ஆம் தேதி ஊஞ்சல் உற்சவம், 13 ஆம் தேதி 108 சங்காபிஷேகம் நடைபெறவுள்ளதாக கோவில் நிர்வாகித்தினர் தெரிவித்து உள்ளனர்.