திருச்சி, வைகுண்ட ஏகாதசியையொட்டி தமிழகம் முழுவதிலும் வைணவ தளங்களில் அமைந்துள்ள பெருமாள் கோவில்களில் சொர்க்கவாசல் திறப்பு நிகழ்ச்சி கோலாகலமாக நடைபெற்றது. இதில் ஏராளமான பக்தர்கள் கலந்து கொண்டு தரிசனம் செய்தனர்.
பூலோக வைகுண்டம் என போற்றப்படும் ஸ்ரீரங்கம் ரெங்கநாதர் கோவிலில் வைகுண்ட ஏகாதசியான நேற்று (சனிக்கிழமை) அதிகாலை 4 மணிக்கு பக்தர்களின் கோவிந்தா, கோவிந்தா, ரங்கா, ரங்கா என்ற கோஷங்களுகிடையே சொர்க்கவாசல் திறக்கப்பட்டது. இதற்காக உற்சவர் நம்பெருமாள் ரத்தினஅங்கி, பாண்டியன் கொண்டை, கிளிமாலை உள்பட பல்வேறு சிறப்பு திருவாபரணங்கள் அணிந்து அதிகாலை 3.30 மணியளவில் மூலஸ்தானத்தில் இருந்து துலா லக்கனத்தில் புறப்பட்டு வெளியில் வந்தார். இரண்டாம் பிரகாரம் வலம் வந்து நாழிகேட்டான் வாசல் வழியே மூன்றாம் பிரகாரத்திற்கு வந்த நம்பெருமாள், துரைப்பிரதட்சணம் வழியாக பரமபதவாசல் பகுதிக்கு வந்தார்.
முன்னதாக விரஜாநதி மண்டபத்தில் அவர் வேத விண்ணப்பம் கேட்டருளினார். அதனைத்தொடர்ந்து காலை 4 மணியளவில் பரமபதவாசல் எனப்படும் சொர்க்க வாசல் திறக்கப்பட்டது.அப்போது நம்பெருமாள் பக்தர்கள் புடைசூழ பரமபதவாசலை கடந்து மணல்வெளி, நடைப்பந்தல், தவுட்டரவாசல் வழியாக ஆயிரங்கால் மண்டபத்தின் எதிரில் உள்ள திருக்கொட்டகைக்கு வருகிறார்.மேலும் ஸ்ரீரங்கத்தில் சொர்க்கவாசல் திறப்பு விழாவையொட்டி பலத்த போலீஸ் பாதுகாப்பு போடப்பட்டிருந்தது.
ஸ்ரீவில்லிபுத்தூர் ஆண்டாள் கோவிலில் சொர்க்கவாசல் எனும் பரமபதவாசல் நேற்று காலை திறக்கப்பட்டது. ஆண்டாள் பிறந்த ஊர் என்பதால் பல்வேறு மாநிலத்தில் இருந்து பல்லாயிரக்கணக்கான பக்தர்கள் சாமி தரிசனம் செய்தனர்.
திருவண்ணாமலை அண்ணாமலையார் கோவிலில் வைகுண்ட ஏகாதசியை முன்னிட்டு வேணுகோபால் சன்னதியில் சிறப்பு பூஜைகள் செய்யப்பட்டு வைகுண்ட வாயில் திறக்கப்பட்டது. அதையொட்டி, ஏராளமான பக்தர்கள் வைகுண்ட வாயில் வழியாக வந்தனர். வெள்ளிக் கவச அலங்காரத்தில் பாமா ருக்மணி சமேத வேணுகோபால் உலா வந்தனர்.
சென்னை திருவல்லிக்கேணி பார்த்தசாரதி கோவிலிலும் வைகுண்ட ஏகாதசியை முன்னிட்டு சொர்க்கவாசல் திறக்கப்பட்டது. சிறப்பு அலங்காரத்தில் பக்தர்களுக்கு காட்சியளித்து, சொர்க்கவாசலை கடந்து சென்ற பார்த்தசாரதி பெருமாள் கோவிந்தா, கோவிந்தா என பக்தி முழக்கத்துடன் பக்தர்கள் சாமி தரிசனம்.
மேலும் கரூர், ஸ்ரீ அபய பிரதான ரங்கநாதர் சுவாமி கோவிலில் வைகுண்ட ஏகாதசியை முன்னிட்டு சொர்க்கவாசல் திறக்கப்பட்டது. சேலம், ஆத்தூர் கோட்டை பிரசன்ன வெங்கடேச பெருமாள் சுவாமி கோவிலில் சொர்க்கவாசல் திறப்பு நிகழ்வு நடைபெற்றது.
மதுரை மாவட்டம் அழகர்கோவில் அருள்மிகு சுந்தரராஜ பெருமாள் கோவிலில் வைகுண்ட ஏகாதசியை முன்னிட்டு சொர்க்கவாசல் திறக்கப்பட்டது. கோவிந்தா கோஷம் முழங்க நம்பெருமாளை திரளான பக்தர்கள் சாமி தரிசனம் செய்தனர்.